Colossians 1

Thonono

1Polo, mvuala wu Yesu Klisto mu luzolo lu Nzambi va kimosi ayi khombꞌeto Timote, 2tufidisidi nkanda kuidi banlongo ayi bakhomba zikuikama mu Klistobadi ku Kolosayi.

Bika nlemvo ayi ndembama bi Nzambi, Dise dieto bibanga yeno.

Lusambulu lu phutudulu yi matondo

3Beto tueti vutula matondo kuidi Nzambi, Dise di Pfumu eto Yesu Klisto, bu tueti sambila mu zithangu zioso mu diambu dieno 4bu tuwilu tsangu yi minu kieno mu Klisto Yesu ayi luzolo lolo luidi yeno mu diambu di banlongo boso ; 5mudiambu di diana diodi lukubukulu mu Diyilu ayi diana diodi lutuama wa mu mambu ma kiedika ma Nsamu wumboti. 6Nsamu wumboti beni wutula nate kuidi beno banga bu wididi mu nza yimvimba. Wawu weti buta mimbutu ayi wulembo yendi ku ntuala ; banga buididi mu beno tona lumbu kioki luwa ayi luzaba nlemvo wu Nzambi mu kiedika kiandi kioso.

7Epafalasi, nkundi eto wu luzolo mu kisalu, niandi wululonga wawu. Niandi widi kisadi kikuikama ki Klisto mu diambu dieno. 8Niandi wutuzabikisidi boso buididi luzolo lueno mu pheve.

MAMBU MOSO MADI MU KLISTO

Lusambulu lu Polo ayi nkunga kuidi Yesu Klisto

9Diawu tona lumbu kioki tuwa buawu, beto mamveto, tukadi vonga mu kulusambidila ayi mu lomba muingi luba lufuluka mu nzayilu yi luzololuandi ; mu nduenga yoso ayi mu diela di Kipheve. 10Mu diambu ludiatila mu phila yifuana mu Pfumu, muingi lummonisa khinimu mambu moso ; bu lumbutanga mimbutu mu mavanga mambote ayi luetayunduka mu nzayilu yi Nzambi. 11Niandi wela kulukindisa mu zingolo zioso boso buididi lulendo luandi lu nkembo mu diambu lubaka bu vibidila mu mambu moso ayi bu kangila ntima nate kuna tsukulu. 12Mu khini, luvutulanga matondo kuidi Tata wutufuanisa muingi mamveno lubaka bu tambudila kiuka kioki kalundila banlongo boso mu kiezila. Bila :

13Niandi wutukula mu lulendo lu tombi
ayi wutunata mu Kipfumu ki Muanꞌandi wu luzolo ;
14mu niandi tutambudidi khudulu
ayi tutambudidi nlemvo wu masumu.
15Niandi mfikula yi Nzambi
yi kayimonikanga ko
ayi niandi wuthete mu butuka mu bivangu bioso.
16Bila mu niandi bima bioso bivangulu :
bima biobi bidi mu diyilu
ayi bima biobi bidi va ntoto,
biobi bieti monika
ayi biobi kabi monikanga ko,
biba bikundu bi kipfumu voti bipfumu,
voti bikulutu voti batu ba lulendo.
Niandi wuvanga bima bioso ;
ayi biawu bivangulu mu diambu diandi.
17Niandi widi ku ntuala bima bioso
ayi bima bioso binzinga mu niandi.
18Niandi ntu wu nitu, dibundu diawu nitu.
Niandi thonono ; wuthete mu butuka mu batu bafua
mu diambu kaba va buangu kithete mu bima bioso.
19Bila Nzambi wuzola ti kinzambi kiandi
kioso kiba mu niandi.
20Ayi mu niandi kazola vutudila
nguizani yidi va khatitsika niandi veka ayi bima bioso ;
biba biobi bidi va ntoto voti biobi bidi ku diyilu
bu kakivangila ndembama
va dikulusi diandi mu menga mandi.
21Beno lutuama ba batatuka ayi Nzambi, buela bambeni ziandi mu mayindu meno ayi mu diambu di mavanga meno mambimbi ; 22mu diambu di buabu, kalumonisa banlongo va ntualꞌandi, batu bakambulu tsembolo ayi bakambulu nzimbala va meso ma Nzambi ; diawu Nzambi kavutudila nguizani andi ayi beno mu lufua lu nitu yi muanꞌandi. 23Mu bila kioki, lufueti ba bakangama mu minu, batungu ayi badi dio ngui. Lubika zimbukusu mu diana diodi di Nsamu wumboti wowo beno luwa. Nsamu wumboti beni wawu wusamunu muidi bivangu bioso bidi va ntoto ayi mu diambu di wawu minu Polo ndiyikila kisadi.

Mvita yi mvuala mu diambu di dibundu

24Buabu ndilembo moni khini mu ziphasi ziozi ndilembo moni mu diambu dieno. Ndilembo dukisa mu nituꞌama ziphasi zikambu mona Klisto mu diambu di nituꞌandi. Nituꞌandi yawu Dibundu. 25Mu diambu di dibundu, ndiyikidi kisadi boso buididi kisalukiphana Nzambi mu diambu dieno, muingi ndikudisa mambu ma Nzambi. 26Mambu beni madi mansueki momo masueko tona mu thonono yi zithangu ayi yi zitsungi vayi buabu mazabukusulu kuidi banlongo bandi. 27Bila Nzambi wuzola kuba zabikisa boso buidi kimvuama ki nkembo bu mansueki momo va khatitsika Bapakanu bu dinsundula ti Klisto widi mu beno, niandi diana di nkembo.

28Klisto beni niandi tueti samuna, mu lubula ayi mu longa kadika mutu mu nduenga yoso mu diambu tumonisa kadika mutu wufuana mu Klisto. 29Kiawu kioki bila ndieti sadila ayi ndieti nuanina boso buididi zingolo ziandi ; ziozi zilembo sadi mu lulendo mu minu.